بعد تسجيل تنامي كبير في حالات الوفات بسبب الاستعمال الخاطئ لسخان الماء ، قام جمال الصحراوي من المهنيين بقطاع الترصيص ببني ملال بتقديم شرح مفصل وواضح حول الاسباب التي تؤدي للوفاة ، وهذا ما كتبه حول الظاهرة :
الناس لي كيموتوا بالشوفو دالحمام بالمئات كل سنة في المغرب, وحنا كنتوصلوا بعشرات الحالات منها..
راه واحد المغالطة كبيرة منتشرة في هاد الموضوع واللي هي أن الأغلبية دالناس كتظن أن السبب هو تسرب الغاز مع الماء.
أولا ماشي تسرب الغاز د البوطة مع الما لي كيقتل وهذا خطأ شائع, لأن الشركات دقنينات الغاز عاملة لهاد الغاز رائحة تُميزه عن باقي الغازات وبالتالي عند حدوث تسرب, الإنسان سيشُم الغاز ويفطن، زائد هو ماكيخنقش غير كيشتعل.
لا شك أننا جميعا لاحظنا أن كل الوفيات بعلاقة مع الشوفو كتكون في فصل الشتاء وحده رغم اننا كاملين كنخدموه في باقي الفصول. علاش ؟؟
الشوفو كتكون فيه واحد الفلام صغيرة شاعلة.. ديك الفلام ضروري ما خاصها الاوكسجين باش تعمل إحتراق كامل..
والانسان فاش كيكون عامل الشوفو فوسط الدار وكيكون فصل الشتاء.. كيكونوا الشراجم ومنافد دخول هواء جديد للدار مسدودة لأنه كاين البرد.. نسبة الأوكسجين اللي فالدار كتكون ثابثة وفاش كتشعل نتا الشوفو, ديك الفلام ديالو كتبدا تكونصومي من ديك 21% دالاوكسجين حتا كتقل النسبة بزاف, وهنا ديك الفلام مكتطفاش ولكن كدوز تدير عملية اخرى وهي الاحتراق الغير الكامل مع غاز ثنائي اوكسيد الكاربون وهاد الاحتراق الغير الكامل هو لي كيعطينا الغاز السام احادي أوكسيد الكاربون اللي ماعندو لا لون لا رائحة لكنه غاز سام ويقتل بسرعة..
ولتفادي هاد الامر ركب الشوفو فشي بالكون ولا قدام الشرجم وفاش تبغي تدوش خلي شي شرجم محلول فالدار منين يدخل شوية دالاوكسجين.. والحمام لي كتدوش فيه ضروري تكون فيه شي فتحة د التهوية ولا شرجم وخا غير صغير.
الهاتف للإستفسار: 0668869215
