نيشان… بعض العمال راه ماعينهمش سيدنا باش يحضيو المواسم ويوليو بحال دوك العونيات لي تابعين زرود والولائم و شطيح ورديح ، راه عينهم من أجل العناية برعايها وبالتنمية…

آخر تحديث : السبت 23 مارس 2019 - 5:01 مساءً
نيشان… بعض العمال راه ماعينهمش سيدنا باش يحضيو المواسم ويوليو بحال دوك العونيات لي تابعين زرود والولائم و شطيح ورديح ، راه عينهم من أجل العناية برعايها وبالتنمية…

تاكسي نيوز // محمد.م

الربيع دخل نهار 21 مارس وللأسف بلعمان والورود مازال مابانو ، وهذا دليل على الازمة الكبيرة لي تايعيشها الفلاح بجهة بني ملال خنيفرة ، حيك هاد العام عرف نذرة في تساقطات الامطار ، والفلاحة متضررة بزاف ، وطبعا هدشي تاينعكس على المواطن البسيط كيفما تايشكل ضرر كبير للفلاح.

الغريب في كل هدشي ان بعض العمال باقاليم جهة بني ملال خنيفرة كاعما مسوقين لمعاناة الفلاحين في السهول وفي الجبال ، وفالوقت لي بغينا نشوفوهم خارجين للتيران باش يشوفو اشنو هي المعاناة ديال رعايا صاحب الجلالة ، تانشوفوهم غا في اللقاءات الرسمية ومع صحاب الجاه والمال ورؤساء الشركات ووو، والاغرب من هذا ان بعض العمال هد الايام ولينا تانشوفوهم غا فالمهرجانات والمواسم ، وتايجيو بلاحشمة للولائم والزرود بحال الى ناقصهم الخير ، وهدشي ربما يكون السبب ديالو دوك الحوالة المبخرين المصاوبين من اموال الشعب خصوصا الى كانو مزوقين بالبيتزات وبودنجال ودكشي…

العمال والولاة راه ماشي حطهم الملك نصره الله باش تكون فيهم اللهطة الله يحفظ ، ويقابلو الزرود والمواسم والمهرجانات ، بالعكس سيدنا قال ليهم خرجو للتيران وشوفو المواطنين اش خاصهم ، ووقفو على مشاكلهم ، خصوصا الفلاح لي الشتا ماصباتش هد العام مزيان والعلف غلا والسلعة غلات…

شي عمال ابتليت بهم جهة بني ملال خنيفرة لا علاقة وفالحقيقة خاص الملك نصره الله يعاود النظر فالبعض فيهم ، حيك هما في واد وخطابات الملك في واد اخر ، لا تنمية حقيقية للاقاليم لي هما عمال عليها لا مبادرة حقيقية لي تزيد بالمنطقة والشباب للامام ، لا مشاريع لا فين يخدمو الشباب لا والو.. غا النوم الثقيل والأبهة الخاوية …

العمال راه ماعينهمش سيدنا باش يحضيو المواسم ويوليو بحال دوك العونيات لي فين مكانت شي زردة او وليمة او شطيح ورديح تايمشيو مع احتراماتي للعونيات لي هديك راها خدمتهم ورزقهم الوحيد… راه الملك عينهم من أجل خدمة رعاياه والعناية بهم وبالتنمية وو..

سيدنا خاصو يدير زيارة لأقاليم جهة بني ملال خنيفرة وغادي يكتشف بلي شي اقاليم كيف خلاها كيف راه باقا ، بالعكس واحد الاقليم عاد ما رجع لور ، وتا انجاز مافيه غير المواسم والمهرجانات والزرود والحوالا مشويين …

من جهة اخرى تانشوفو الاساتذة المتعاقدين تايحتجو وتايطالبو بالغاء التعاقد والادماج فالوظيفة ، وفي الوقت نفسه تانشوفو العمال ناعسين وتايشخرو فالبيروات ديالهم وتايعطيو الاوامر غ بالتليفونات بدل ما ينزلو للتيران ويعرفو اشنو المطالب ديال ولاد الشعب ويعارفو كيف يتعاملو معها ، وراه امثال هاد العمال لي ناعسين هما لي تايعطيو صورة سلبية على الدولة وتايخليو المواطن يتأكد بلي مكايناش ارادة حقيقية للمسؤولين باش يعالجو قضايا الشعب وهدشي طبعا تايخيب ظن جلالة الملك فيهم ، وهدشي علاش تايعفي عدد كبير منهم حيك لي ماقادش على المسؤولية فهاد العمال خاصو يحط السوارت والباب أ الحباب…

Share Button
2019-03-23 2019-03-23
أترك تعليقك
0 تعليق
*الاسم
*البريد الالكترونى
الحقول المطلوبة*

لن يتم نشر عنوان بريدك الإلكتروني.

شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

تاكسي نيوز