عن مغرب القانون
إلى شدوك البوليس أو الجوندارم بتهمة معينة.. كيفاش خاصك تتصرف؟؟ و شنو الحقوق اللي كيضمن ليك القانون سواء كنتي مدان فعلا أو بريء؟؟
▪من الجديد اللي جا بيه دستور 2011 بهاد الخصوص و أكد عليه قانون المسطرة الجنائية أن أي مواطن شدوه البوليس أو الجوندارم و داروه تحت ما يسمى ب “الحراسة النظرية” باش يحققوا معاه.. عندو الحق :
أولا: يعرف التهمة الموجهة إليه (يعني ماشي يقولو ليه زيد معانا و غتعرف علاش!! ).
ثانيا: عندو الحق يتصل بالمحامي ديالو أو يطلب من الشرطة القضائية بنفسها تعين ليه محامي باش يقدم ليه مساعدات قانونية و يوريه شنو يدير.. ☆لأن شحال من واحد بريء و كيمشي ضحية لأنه ما عرفش شنو يقول فمحضر الاستماع و وقَّع على شي حاجة اللي هو ما دايرهاش تحت الضغط.
ثالثا: عندو الحق يتصل بأحد الأقارب ديالو باش يساعدو ويعاونو.
رابعا: عندو الحق ميتكلم كلمة وحدة ويلتزم الصمت و ما يصرح بحتى شي حاجة.
طبعا إلى بان ليه شي تجاوز فاستعمال السلطة عندو الحق يرفع شكاية للسيد وكيل الملك أو الوكيل العام حيت الأول كاين فالمحكمة الابتدائية والثاني فالاستئناف .
غير واح المعلومة لا بد نشرحهلكم الخوت وهي أن “الحراسة النظرية” ماشي هي“الاعتقال الاحتياطي”.. الأولى كتخاذ من طرف الشرطة القضائية خلال البحث التمهيدي العادي أو التلبسي، و الثانية من لدن قاضي التحقيق خلال التحقيق الاعدادي و المرحلة القضائية.
