تاكسي نيوز
بعض الأحيان تلقاو روسنا مضطرين باش نشرحو لبعض الناس لي تاتمشي تصدق الشائعات ، فمثلا كاين لي معرفناهش منين جايب الهضرة ديال حالة بوعشوش خرج من السبيطار وحالة اولاد يعيش فيها السل وراها فدارها!! ، والغريب كاينين شي وحدين قراو هاد التخربيق فشي صفحات وجاو لعدنا وتايقولو لينا ياك قلتو بلي حالة اولاد يعيش خرجات ؟!!! فين عمرنا قلناها!!
أولا تاكسي نيوز ماعمرها قالت بلي حالة اولاد يعيش فيها السل وماعمرنا قلنا بلي راها خرجات من سبيطار ، ثانيا لي متبع تاكسي نيوز غادي يعرف الحقيقة والخبر اليقين لاننا قراب من الحدث ومراسلنا تايغامر براسو باش يجيب هاد الاخبار من قلب سبيطار . ثالثا لي تايتبع أخبار السوق بمعناها الكاذب والصفحات التي تنطق عن الهوى وبدون معطيات رسمية غادي يتوه . نتمناو من بعض الناس ولي هما فئة قليلة مايْقَوْلوناش شي حاجة ماقلناهاش ويتبعو الاخبار ديال تاكسي نيوز لاننا نبنيها على معطيات دقيقة .
وهاد ناس لي تايقولو السيدة ديال ولاد يعيش فيها السل وخرجات فراه هاد الهضرة غير صحيحة وهي تتعالج لحد الان من كورونا داخل كوفيد 19 بالمستشفى الجهوي ببني ملال ولاتزال تنتظر نتيجة تحليلة اجريت عليها والله يشافيها ولي بغا يزيد يتيقن يطلع لسبيطار راه من حقو يشد المعلومة.
اما الناس لي قالو ان حالة السيد لي في بوعشوش راه خرج وتلاقاوه الجيران لبارح بالشطيح ، غانقولو ليكم هدوك لي خرجو غير الاسرة ديالو المخالطة ولي خرجات ليهم النتائج سلبية ومافيهمش الفيروس أما الشاب ولدهم المصاب فراه لحد الان راه تايتعالج داخل جناح كوفيد 19 بالمستشفى الجهوي ببني ملال .وحتى هو دارو لو تحليلة اخرى باش يعرفو فين وصل المرض ديالو والله يشافيه.
أما المخالطين ديال الحالتين بجوج ديال بوعشوش واولاد يعيش فراه النص فالنتائج ديال المخالطين خرجو مزيانين والنص الاخر باقي ينتظر النتائج لي غادي نقولوها ليكم فور الاعلان عنها وهذا التأخير راجع الى الضغط في الدار البيضاء وقريبا غادي يتفتح مختبر للتحليلات ببني ملال .
اذن لحدود هذا الصباح جهة بني ملال خنيفرة لا تزال ب 87 حالة حسب مديرية الصحة وليس 89 كما نشرت بعض المواقع، وندعو قراءنا الى عدم الانسياق وراء بعض الصفحات التي “جيب يافم وقول” ومعها بعض المواقع التي تبني معطياتها بالعمليات الحسابية للنسب حسب الجهات ، فموقع تاكسي نيوز قريب من الاحداث ومن جميع الحالات المسجلة بجهة بني ملال خنيفرة وننشر اليقين وننشر الارقام المضبوطة والرسمية .ونتحمل مسؤوليتنا في كل ما ننشر.وتحية لقراءنا الاوفياء الذين يثقون بالموقع ولا يثقون سوى فيما ننشر.
وبه وجب الإخبار والسلام
