تاكسي نيوز
وزارة الصحة مابقاتش تاتنشر المعطيات ديال عدد الاصابات حسب الجهات ، وهدشي فتح لباب لمجموعة من التساءلات امام الراي العام والقراء ديال تاكسي نيوز لي متبعينا حيك تايشوفو فينا المصداقية في تقديم المعطيات الرسمية .
لكن بهاد التوقيف ديال وزارة الصحة ولينا ماتانعارفوش شحال ديال الحالات تزادت فالجهة ، وهدشي تايخلي التساءلات والاشاعات تتكاثر ، وتايفتح الباب امام التنجيم وتقدير المعطيات ، وفهاد الحالة الوزارة هي لي مسؤولة على الاخبار المزيفة لي غادي تولي كثيرة.
كاين لي قال بلي الوزارة دارت التعتيم على المعلومة ، وكاين لي قال عطب تقني ، وكاين لي قال بلي وزارة الصحة خلقات نوع من الثقة مابينها ومابين المغاربة وبحال هاد التعتيم تايخلي الواحد يتساءل حول عدد الاصابات المعلنة ، لكن حنا غانقولو بلي وزارة الصحة تاتبدل مجهود كبير والغايب حجتو معاه وماغاديش نحكمو عليها في انتظار انها تخرج بتوضيحات في الموضوع.
لي خاص يعرف الرأي العام لي متبعنا ولي وصل العدد ديال القراء عدنا ازيد من 12 مليون متتبع لتاكسي نيوز من داخل وخارج الجهة وخارج الوطن وغادي نشرو الاحصائيات ديالنا لاحقا ؛ غانقولو ليكم راه غادي نبحثو ونقلبو ونتاصلو بمصادرنا وراء السادسة مساء من كل يوم وغادي نبلغوكم بالجديد .
والله ولي التوفيق ونطلبو الله يرفع الوباء وتحفظ البلاد
