تاكسي نيوز // حميد الخلوقي
هدشي مشي معقول لي تايوقع هاد اليومين بعد فرض حالة الطوارئ، والامر يتعلق بنداءات المواطنين الكثيفة لي توصل بها الموقع ولي تايشكيو فيها من عدم التوصل ديالهم بالورقة الاستثنائية ديال الخروج من المنزل. طبعا ، مايمكنش نطبقو داك المثل ديال طاحت الصمعة نعلقو المقدم ، حيث مايمكنش بين ليلة وضحاها عون السلطة يعطي فنهار واحد ازيد من 600 وثيقة ، وبلاما نهضرو على شي وحدين لي تايطالبو ب4 ديال الوثائق وحدة ليه وحدة لمراتو وحدة لخوه وحدة لولدو ، كلهم بين ليلة ونهار ولاو مسؤولين على الدار. والمقدمين مايمكنش نطلبو منهم المستحيل حيك ماعينهم يشاركو فالحملة التحسيس والتوعية ،ماعينهم يشاركو فحملة التعقيم والتطهير، ماعينهم يشاركو فحملات امنية ، ماعينهم يفرقو هاد الوراق …راه بشر هما ماشي ماكينات وخاصهم العوين…
دبا نهضرو فالمهم ، فمهما كان فالمواطن من حقو يشد الوثيقة ليوم قبل غد مادام ان السلطات مزايرة عليها ، وتايطلبوها فالشوارع ، وطبعا غادي نقولو للسيد الوالي علاش ما تخدمش الموظفين ديال المقاطعات وديال الدوائر والقيادات والعمالة ، حقاش هذي وقت الازمة ماشي وقت الراحة السبت والاحد ، راه وقت الحزة كلشي الموظفين ديال الداخلية خاصهم يخرجو للتيران ماشي نبقاو مخزونين فالدار…
