تاكسي نيوز / تصوير :رضوان العافية
الاباء والامهات ومعهم الأطفال في وضعية اعاقة خرجو لبارح امام مقر جمعية صوت المعاق وحتجو على حرمانهم من الدعم لي تايخصصو التعاون الوطني ، وطالبوا والي الجهة يتدخل فهاد المشكل باش الوليدات يقراو حتا هما بحالهم بحال الاسوياء.
فالحقيقة باقي العقليات عندنا فالمغرب غاديا اللور ، حيك الدعم هو حق ماشي صدقة وهداك المسؤول راه تايعطي الدعم من فلوس الدولة ومن فلوس الشعب ، وخصوصا الى كانت فئة بحال هاد لوليدات لي من ذوي الاحتياجات الخاصة ولي خاصهم الدعم والمساندة والمؤازرة .
حنا ماتايهموناش الاسباب والمبررات ديال التعاون الوطني لمنع الدعم بقدر ما تايهمنا هاد لوليدات يقراو ويرعاوهم ، والى كان التعاون تايشوف بلي الجمعية ماقدراش ترعاهم او عندها مشكل ، ينوض التعاون براسو ويتكفل بهاد لوليدات ويشرف عليهم هو ، حيك الاهم فهادش هو يقراو .
بصراحة والي الجهة خاصو يتدخل ويعرف اش واقع ويحل هاد المشكل ، راه اخر حاجة بقات لينا فهاد الجهة المهمشة هي يخرجو هاد الوليدات للشارع يحتجو!
