تاكسي نيوز // خاص
واحد الصفقة قام بها مدير المصالح بمجلس جهة بني ملال خنيفرة تاتهم طابليطات الكترونية ولي فازت بها صاحبة شركة ببني ملال ، هاد طابليطات شراوهم باش يعطيوهم لأعضاء مجلس الجهة وبعض الموظفين ، والهدف من هاد العملية هو يحايدو العمل بالوثائق الورقية في اللجن وفي اشغال الدورات ديال المجلس ، وباش جميع الاعضاء تاهما يواكبو التطور الرقمي والعصرنة ، ويوليو يناقشو جدول الاعمال ديال الدورات والمشاريع فالطابليطات بلا وراق بلا ملفات.
هذي فالحقيقة وبدون نفاق فكرة مزيانة من ابراهيم مجاهد لي بغا يعصرن المجلس وفي نفس الوقت باش يرشد النفقات ومايبقاش يخسر كل مرة ميزانية على طبع الوثائق ، لكن المتتبع لاشغال اللجن الدائمة لي تتوجد للدورة العادية ديال اكتوبر لمجلس جهة بني ملال خنيفرة ، تايشوف بلي الطابليطات غابرين وتاواحد ماتايجيبها معاه ، وهدشي تايخلي التأويلات تكثر ، حيك كاين لي تايقول بلي اغلب الاعضاء عطاو هاد الطبليطات لي شدوهم من المال العام عطاوهم لولادهم ولازواجهم واقاربهم ، حيك اسيدي كاين لي مارضاش بها وقال بلي طابليطات عيانين رغم ان الاوصاف التقنية لي حصلات عليها تاكسي نيوز تاتقول العكس بلي هدوك طابليطات خدامين والذاكرة ديالهم كبيرة 32 جيكا ومن الجيل الجديد .
المهم غادي مانزربوش فالحكم وغادي نتسناو حتى للدورة ديال اكتوبر ونشوفو واش الاعضاء غادي يخدمو بالطابليطات أو أنهم باقيين مربيين الكبدة على الاوراق ، او ان الطابليطات مشاو مع الواد وحنا بقينا مع الجواد…
