تاكسي نيوز / محمد الكاموني
وانا اتابع فيديو نشراتو تاكسي نيوز لجزء من الندوة لي عقدها سليفاني مدير أكاديمية بني ملال خنيفرة حول التوظيف الجهوي ، تجبدات قضية الحراس وعاملات النظافة بالمؤسسات التعليمية ، ولي غامقة عليهم الشركات وتاتستعبدهم وتاتخلص البعض ب700 درهم والبعض الاخر خدامين فابور ، مدير الاكاديمية جاوب على هذ القضية وجوابو كان مامقبولش بتاتا وماشي منطقي ، سليفاني قال :” الاكاديمية تاتربطها صفقة مع الشركة وماعدناش حق نتدخلو فيها فالأجور والطرد حيك مكاينش اطار قانوني ” ، دبا يا مدير الاكاديمية تايتملص من الجواب وقدم هد المبرر غير المقبول ، يا حنا الصحافيين لي مافاهمينس وماتانفهموش ومكلخين ، حيك مايمكنش نقبلو هد المبرر من مسؤول كبير ، راه اصلا فاش تاتبرم مؤسسة عمومية شي صفقة مع شركة خاصة تاتلزمها باحترام الحد الادنى للاجور ، واحترام كرامة العمال ، لانهم في الاول والاخير تايوليو محسوبين على المؤسسة واي تجاوز للقانون تايشوه المؤسسة ديال التعليم ماشي الشركة ، ومن جهة اخرى شكون تايخلص دوك الشركات ياك الدولة يعني الاكاديمية كمؤسسة مسؤولة خاصها ماتسمحش للاجور توصل 700 درهم ويخدمو فابور 6 اشهر ، هذي راه مهزلة كبيرة ، الدولة ووزارة امزازي هي لي خاصها تحمي المواطنين ديالها والطبقة الشغيلة ماشي تشجع الشركات على هضم حقوق الكادحين والكادحات ، واش ترضا الاكاديمية باش يخدمو عندها عيالات فابور ومايتخلصوش بحجة انها لا سلطة لها على الشركة ، بالعكس نت كمؤسسة عندك الحق والصلاحية تلغي ديك الصفقة كاع ، والغريب انه حسب ما اكدو لنا مصادر بلي كاع العمال والعاملات لي حتجو نهار الخميس امام الاكاديمية رسلو فحقهم شي مذكرة كتابية او هاتفية باش يطردوهم ، وهدشي راه ماشي معقول وتايرجع بنا لعهد الرصاص وعهود العبودية لي المغرب الجديد قطع معها .
