تفهم تحماق… واحد الشركة عقارية كاتبة “مهرجان بني ملال 2018” دايرة سهرة فالهواء وماعندها علاقة بالمهرجان وجاهم بنادم قليل بزاف – الصورة-

تاكسي نيوز // حميد الخلوقي 

حصلة خايبة  دبا واقعة لواحد الشركة كاتبيع العقار ، معايطة على شي فنانين مغاربة باش يغنيو فبني ملال ، ودارو المنصة فتيرة ديال باعلال ،كانو معولين زعما باش يكون الجمهور غفير ، ساعة جاهم بنادم قليل بزاف ، ودبا هدي 9 ونصف ديال ليل باقي  ما طلع المغني يغني وحتى ناس مكاينينش.

بنادم تخلطات عليه الامور حيك هاد الشركة السكنية لي  دايرة هدشي كاتبة فلافتات “مهرجان بني ملال 2018” وناس تاتعتاقد بلي راه هدا هو المهرجان ديال لمجلس الجماعي ، وخا هو ماعندو علاقة به ، ناس تعتقد بلي راه مهرجان. ولي مامفهومش ان دوك الحواجز ديال جماعة اولاد يوسف ماشي بني ملال. انظر الصورة

دبا شركة عملاقة بحال هادي كيفاش غادي طيح فهاد الخطأ الفادح لي خاسرة فيه زبالة ديال لفلوس ، باش تروج للبقع ديالها وفالاخير تلقا راسها فهاد الموقف .

كاين فناس لي نتاقدو مكان السهرة لي جا قريب من مصحات طبية ولي تايقولو بلي المجلس الجماعي ماراعاش للمرضى فاش عطاهم ترخيص تماك.ناهيك على الغبارية لي من كل جهة بحال الى راه حنا فتبوريدة.

فالحقيقة استغربنا لهاد شركة لي كان خاص يكونو عندها ناس محتارفين فالتسويق ويعتامدو على طرق اشهارية ناجحة لي تجيب ليهم ناس تشري ماشي يخسرو اموال كبيرة وفي الاخير بنادم يتفرج ويمشي فحالو وتاحاجة مكاينة فالبيع لي هو الاساس!!!!