جبل التنمية فالجهة تحرك وولد لينا فار الجرادي!…فالوقت لي كنا تانتاظرو عادل البراكات رئيس مجلس جهة بني ملال خنيفرة، يخرج للميدان في اخر الساعات من ولايته الانتخابية ونشوفوه وسط المقاولات الجديدة و المشاريع التنموية الكبرى لي تاتليق بالمقام ديال مجلس الجهة، شفناه هاد الايام خارج لينا فالمشاريع ديال الربيع والگازو والجرادي و”الحرّيݣة”، مشاريع يكفي ان موظف بسيط فالمجلس يتابع الانجاز ديالها بلا حايحة وبلا شوشرة وبلا شرح بالعرنسية…
الشباب فجهة بني ملال ، كان املهم ان رئيس الجهة يخرج عليهم بشي مبادرات تنموية و مشاريع كبيرة لي توفر ليهم الشغل وتحفظ ليهم الكرامة ديالهم، ماشي نشوفوهم تايعانيو مع غياب فرص الشغل غياب المشاريع والمبادرات التنموية فاقاليمهم ، وماشي نشوفو بعضهم تايحتج من فوق الريزوات وامام البلديات وفالساحات بحال دمنات وأزيلال وتادلة…وتكون الجهة بسببهم على لسان الرأي العام المغربي بل وحتى العالمي كما وقع مؤخرا فتادلة.
اشنو الاضافة لي عطاها لينا مجلس الجهة فهد الولاية ديالو ، لا معامل تزادو لا مشاريع تنموية صناعية وتجارية وسياحية تزادو، ولا عدالة مجالية بين الاقاليم ،خريبكة تاتشكي وخنيفرة تاتشكي وازيلال تاتشكي وبني ملال والفقيه بن صالح تاهما… اشنو غادي تستافد الامة من حديقة او جردة او منتزه ايكولوجي فبني ملال عامر سيما وكولو كراسا ديال السيما ، اشنو قيمة منتزه ايكولوجي الى ماكانش حل المطرح البلدي لي فجنبو ولي الروائح ديالو منتاشرة فاحياء بني ملال ، واش نكلسو فمنتزه اخضر ونشمو الريحة الخانزة من المطرح… اشنو قيمة المنتزهات فمدينة مهمشة وفيها البطالة كثيرة ، راه الناس تاتبغي تساراح من بعد اسبوع ديال العمل ماشي العكس…
سكان جهة بني ملال بغاو الاستثمارات والمشاريع الكبرى من مجلس الجهة ماشي الجرادي والگازو و”الحرّيگة” لي من اختصاص الجماعات ، بغينا نشمو هواء نقي ماشي منتزه قريب لمطرح نفايات ولاد ضريد لي ريحتو مخنزة احياء المدينة، بغينا فين يخدمو الشباب بغينا مبادرات تنموية بغينا وبغينا …
نتمناو مجلس الجهة يفهم الرسالة وفي المستقبل يعطينا فرص شغل ويعطينا تنمية حقيقية ماشي جرادي واشجار الزيتون والربيع والگازو…
