تاكسي نيوز// العربي مزوني
يبدو أن “النبك” بقا غا مشتت فالدورة ديال جماعة بني ملال، وطبعا المستوى ديال النقاش لي وصلو ليه شي مستشارين ومستشارات مايقدر يوصفو غا النبگ نيت.
المنتخبين والمنتخبات ديال بني ملال بان بعضهم بلي غا طايح من السما وغا خبز ربي في طبگو ومابينهم وبين تسيير الشأن المحلي غا الخير والاحسان، وهذا هو الاشكال الكبير لي مخلي المشاريع فهد المدينة باهتة ولا ترقى لمستوى تطلعات المواطنين.
الدورة ديال ماي بينات الضعف الكبير ديال الممثلين والممثلات ديال بني ملال فالجماعة، بينات بلي 5 سنين ديال المشاركة فالتسيير وفي الاخير ما سمعنا منهم غا “النبگ” ، ضعف فلغة النقاش ضعف فالحوار ضعف فمناقشة المشاريع، الا من رحم ربي من المستشارين لي مخضرمين ومتشبعين بالثقافة الحقوقية والنضالية.
المهم ياسيدي واحد المستسارة طلع ليها الزعاف ووجهت انتقادات لمستشارة اخرى وقالت ليها :” نتوما حاضيين غا التفاهات، سيري تنبگي”، هدشي خلا المستشارة المستهدفة توقف وتقول لها :” أيوا أيوا أطونسيو أطنسيو ماتقوليش لي نبگ وغادي نتابعك قانونيا “.
سير عالله
