مع سوسو
وزير العدل عبد اللطيف وهبي أكد بدون مقدمات وبشكل صريح وعلى المباشر بلي الحزب ديال الجرار فبني ملال غادي يدعم مرشح حزب الاحرار في انتخابات المقعد البرلماني، تنفيذا للتحالف الحكومي المشكل للحكومة.
وبالتالي فالهضرة لي سبق وقلنا ف”تاكسي نيوز” طلعات صحيحة، بلي براكات عاجز عن اتخاذ اي قرار فهاد الخصوص خارج قرار الامانة العامة، وهكا غادي تشد الفقصة بعض القيادات فحزب التراكتور لي كانت ناوية تترشح لهاد المقعد البرلماني.
محللون سياسيون تايشوفو بلي بني ملال بوحدها لي تايطبقو فيها القرارات المركزية من الاحزاب، وهناك مدن اخرى قررت تخرج على التحالف وترشح الناس ديالها، وهذا هو المنطق، حيت راه كاين خلط فهاد المفهوم ديال التحالف وفين يمكن تطبقو هد الاحزاب. فهاد التحالف تايخص الاحزاب من بعد الفوز ديالها فالانتخابات ماشي قبل، والتحالف الحكومي داروه بعد اعلان نتائج الانتخابات وتقاسمو من خلالو الحقائب الوزارية ماشي من قبل اعلان النتائج، يعني هدوك الاحزاب لي تحالفو كلهم فازو بالمقاعد الانتخابية، عاد تحالفو من بعد. ولكن دبا العكس، وهبي فرض عليهم الامر الواقع وعطا الامر باش يحرم اعضاء فالحزب ديالو فبني ملال من حقهم فالترشح حيت باقي ماوصلوش لتوقيت التحالف.
واحد المصدر سياسي تايقول بلي الى قبلو هد الاعضاء بتعليمات وهبي راه غايكون غا من باب الخوف على عضوياتهم داخل الحزب وليس بالايمان ديالهم بديمقراطية وقرارات الحزب، نعم الحزب لي فرض عليهم مايترشحوش كاع ، ويطيعو كلام كبير الحزب.
دبا الى طبقنا منطق الاحتكام للتحالف حسب فهم وهبي هي كان حزب الجرار مايرشح تاواحد فالانتخابات السابقة ويدعم المرشحين ديال الاحرار ويصوت عليهم. هدشي ماعندو معنى ويقدر يخلق بلبلة داخل الحزب لحد مغادرة البعض. يقول مصدر حزبي لتاكسي نيوز.
مهم غا الله يخرج العاقبة ديال هد الانتخابات فبني ملال بخير!!
