الحلقة 1 مع “سوسو”… “الحمامة” طايرة فالسما وتاتخدم في صمت و”السبولة” طالقة الزريعة باش يحرثو القلع المحصنة بجميع قرى بني موسى وبني عمير 

24 يوليو 2019
الحلقة 1 مع “سوسو”… “الحمامة” طايرة فالسما وتاتخدم في صمت و”السبولة” طالقة الزريعة باش يحرثو القلع المحصنة بجميع قرى بني موسى وبني عمير 
عزيز سوسو 

 

تانضربو موعد مع القراء ديال تاكسي نيوز اكبر موقع بالجهة بنشر سلسلة حلقات سميناها “مع سوسو” ولي غادي نغوصو فيها فخبايا السياسة والاحزاب بجهة بني ملال خنيفرة ومن خلالها نخبرو المواطن والساكنة بكل صغيرة وكبيرة عن الشأن السياسي بهاد الجهة. وحلقة اليوم غادي نبداوها من الفقيه بن صالح، وكيف تايقولو الهضرة ماتشري خضرة ، والخدمة فالصمت هي لي تاتجيب النتائج ، هدشي ينطبق على الساحة السياسية بقبائل بني عمير وبني موسى بالفقيه بن صالح ،فالكل يترقب اشنو غادي تسفر عليه الانتخابات الجاية وشكون لي غادي يكتاسح الصنادق وشكون هو الحزب لي غادي يقدر يؤثر فقرار المواطن العميري الشكدالي والموساوي. كلها اسئلة خاص اجوبة عليها…

تاكسي نيوز سولات متتبع وعارف بالشأن السياسي فالفقيه بن صالح ، وأكد أن الفقيه بن صالح فيها دبا جوج ديال الاحزاب لي قوية  والبقية ضعيفة ، كان لي ضعيف اصلا وكان لي كان قوي وولى تاينهار شوية بشوية .

فجوج الأحزاب القوية هما الحمامة والسنبلة ، فالحمامة طايرة فسماء بني عمير وبني موسى وتاتخدم في صمت ، وتاتكتاسح القرى وتاتوجد للانتخابات بتبات ورزانة وعقلانية ، فرموز الحمامة خدامين الحملة من دبا ،وتايعبؤو فالقواعد باش يحرثو مزيان الاصوات فالانتخابات المقبلة.

اما السبولة،يقول المحلل السياسي ديالنا، فراها  مابقاتش تاتخدم غا فالفقيه بن صالح المدينة ، راه ولات تاتلوح زريعة ديالها فالقرى والمداشر لي كانت فالأمس القريب محصنة وتعتبر قلعة من قلاع حزب عتيد ، هد الحزب لي تعرات العورة ديالو فالإنتخابات الجزئية وكشف الاوراق ديالو الداخلية لعامة الناس ، وطبعا الناس راه ولات فاهمة مزيان فالسياسة وهدشي غادي يخلي فئة عريضة تبدل القناعة ديالها فداك الحزب لي عرى الخيوط ديالو ولا فراجة للجميع سواء محليا وجهويا سواء وطنيا.

السبولة كيف قلنا خدامين وزاد نفوذ ديالهم بدليل انهم ولاو محكمين حتى فشي اعضاء فالاحزاب المنافسة وتايمليو عليهم القرارات ، وتايقولو ليهم هاعلامن تصوتو وهاعلامن ماتصوتوش، وهدشي بان فالانتخابات الجزئية ديال كرسي البرلمان بمجلس جهة بني ملال خنيفرة.السبولة ستاغلات الخلافات ديال بعض الاحزاب وعطاتها للخدمة ودبا تاتزرع مزيان وتاتغطي جميع القبائل ديال بني عمير وحتى ديال بني موسى.وكلشي ولى تايشوف بلي هاد جوج الاحزاب هما لي غادي يقدرو يكتاسحو الانتخابات الجاية وغادي يعصفو بباقي الاحزاب بالفقيه بن صالح لاسيما الحزب لي ولى كايتهرس ، ولي حتى الخدمة ديالو فالمجالس المنتخبة ولات تاتلقى غضب كبير للساكنة بحكم ما تايسميوه اقصاء ممنهج وتعامل بمنطق الحزبية في توزيع المشاريع على ابناء الإقليم الواحد.
المحلل ديالنا تايقول بلي هاد جوج الاحزاب هما لي غادي يشتد التنافس بيناتهم وواحد فيهم هو لي غادي يكتاسح الفقيه بن صالح ، طبعا الى السلطة التازمات الحياد ومادعماتش حزب معين على حساب هاد الحزبين ، خصوصا وان مجموعة من السكان تايشوفو بلي السلطة متحيزة شوية لداك الحزب المعين وقدر تعاونو سياسيا باش على الاقل ما يطيحش فمرة واحدة ، ويربح وخا غا شي كراسة تحفظ ليه ماء الوجه.

الاخبار العاجلة