القرار لي خداه امزازي ديال دخول الصحافيين لمراكز الامتحانات لتغطية الأجواء ماعندو لا ساس لا راس غا ازعاج للمترشحين والمترشحات

تاكسي نيوز / حميد الخلوقي

وزارة التربية الوطنية خدات واحد القرار مامفهومش وسابق ماعمرو كان ، وهو السماح للصحافة باش تدخل الى داخل مراكز الامتحانات بالمغرب باش تغطي هذ الحدث ، وخا امزازي وضع شروط صارمة على الصحافيين سواء من حيث البطاقة سواء من حيث التدابير الوقائية ، الا ان السيد الوزير ماراعاش النفسية ديال المترشحين والمترشحات لي عدد منهم غادي ينزاعج من التقاط الصور ومن تواجد عدسات الكاميرات ، وكاين لي ماغاديش يبغي يبان فالصور ولكن غادي يخاف يهضر ويتحرم من الامتحان.

حنا عارفين بلي الوزارة بغات هد الحدث يلقى واحد التغطية واسعة لكون المغرب كان من بين الدول القلائل لي قررو باش الامتحانات تمر حضوريا رغم الجائحة ، ولكن خاص الوزارة تعرف بلي هاد التغطيات غادي تشوش على المترشحين فالامتحانات ديالهم . حنا نؤمن بحرية الصحافة ولكن هاد الحرية تاتوقف حين تبدأ حريات المترشحين والمترشحات لي تاضمن ليهم يدوزو الامتحانات دون اي تضييق او تشويش على أفكارهم وتركيزهم. اما الصحافي راه يتسنا قدام المؤسسات ويغطي دخول وخروج التلاميذ وياخد منهم تصريحات خارج مراكز الامتحانات .