الحبيب المصطفى
لاحديث بين الزملاء الصحافيين والاعلاميين سوى عن الاحتقار لي تعرضو لو من طرف المكتب المسير لرجاء بني ملال ، ولي دار ليهم ندوة صحفية مباشرة بعد الهزيمة المُذلة بوادي زم أمام الحسنية . بصفته الفريق المستضيف.
هاد المكتب المسير لي تايترأسو عفيف بصراحة مجموعين فيه غا الهواة وبلاصتو فالهواة ماشي في القسم الاول (طبعا تانقصدو المكتب ماشي الفريق الملالي العريق لي يستاحق القسم الاول)، هاد المكتب نظم ندوة صحافية هاوية ، ودار طبلة وجوج كراسة واحد للمدربين وواحد لشي واحد قالو مكلف بالصحافة فالفريق ولي اصلا خاصو يكون مُلِم بقوانين الكرة المستديرة وبأعراف الندوات الصحفية باش يمكن يقوم بتسيير ندوة صحافية.
الزملاء تداولو بيناتهم الصور لي فالحقيقة حشمنا نشروهم للرأي العام ولكن من باب الامانة نشرناه حقاش راه حتى الجسم الصحافي تايعاني فهاد الجهة المهمشة وتايتنقل وتايتبع الفريق وفي الاخير يهينوه بهاد الطريق الهاوية.
الرئيس بصراحة خاصو يشوف مجموعة من الاكراهات ويحلها ويقلب على الخلل فين كاين حيك لا تسيير لا لَعْب لا لَعابَة لا فرقة لا تنظيم صحفي لا والو …اللهم الجماهير الملالية الكبيرة لي تاتستاحق فريقها الملالي العريق يكون فالقسم الاول .
وفي الاخير نقول اننا نعتز بالحلْقة لي فيها اعراف وقوانين عرفية مايوصلوش ليها هادو فالتنظيم.
