تاكسي نيوز / الحبيب المصطفى
المكتب المسير لرجاء بني ملال لكرة القدم عقد قبل قليل ندوة صحفية في احد الفنادق باش يقدم المدرب الجديد عزيز العامري ، واللي اكد خلال هد الندوة انه غادي يبذل المجهود باش الفريق يبقى فالقسم الوطني الاول ويكون عند حسن ظن الجمهور الملالي.
هاد الندوة تاتأكد ضعف التنظيم للمكتب المسير للرجاء وان هاد التسيير باقي هاوي شوية ومقدرش يطور راسو ويعرف بلي راه فالقسم الاحترافي الاول ، ولعل الدعوة لي توصلو بها بعض الزملاء وماشي كلهم خير دليل على التنظيم الهاوي ، حيك كيفاش غادي المكتب يرسل دعوة بهاد الشكل المبتدأ ولي موحال نلقاوه حتى فقسم الهواة بل حتى في فرق الاحياء. وكيفاش غادي تكون هاد الدعوة فيها نوع من الانتقاء هدا صحبي نعايط ليه هادا صاحب صاحبي حتى هو نعايط ليه ولكن لي ماتانعارفوش وماعندي معاه علاقة او ما عنديش معاه مانرسلش ليه .وللاشارة حتى مجموعة الستار بويز مكانتش فهاد الندوة .
فالحقيقة حتى الزملاء خاصهم يعطيو تساع لمثل هاد المهام ومايطيحوش فمثل هاد المواقف لي تاتحرجهوم مع باقي الزملاء ، وعوض يولي الصحفي يعاتب المكتب تايولي فاص أ فاص مع زميل ديالو لي تايلصق فيه كلشي من طرف المكتب ،بل تايقولو بلي راه كلفوه يعايط لكلشي وهو ماعايطش . رغم حنا تانشوفو ان المكتب مادام تعاقد مع مسؤول اعلامي فراه خاص هاد المسؤول يكون قد المسؤولية ويوزع دعوات على كلشي ومايقصي حد .وحنا تانهضرو غيرة على الزملاء لي تقصاو رغم ان مراسلنا توصل بالدعوة.
على أي هذا غا قوس حليناه وهاحنا سديناه ،والصحافيين يبعدو على مهمة يتكلفو باستدعاء زملائهم حيك ماداخلاش فخدمتهم ، ونتمناو للمدرب الجديد التوفيق فالمهام ديالو ، حيك في الاول والاخير تايبقى غيرتنا على الفريق ومصلحته فوق كل اعتبار.
