مع سوسو / عمر منتصر
اش واقع داخل حزب الأصالة والمعاصرة ببني ملال ، سؤال ولى العديد تايطرحو في كل مرة ، حقاش الحزب تايمر من مطبات وأزمات داخلية عديدة ، فبعدما فكو الجرة ديال اللوائح وخا باقي ماكايناش شي تزكية رسمية ، ناضت البرلمانية المثيرة للجدل مريم وحساة فركعات واحد الرمانة داخل الحزب ، وطرحات شي ألغام فواحد اللقاء صحفي مع الرمضاني.
وحساة مريم لي وجهت المدفعية ديالها للحزب وخربقات لو الاوراق محليا وهدشي غاينعكس حتى وطنيا على وهبي ورفاقو ، قالت بلي الاهداف لي خلاوها تدخل للحزب ماغيراتهمش ، و”لكن الحزب على المستوى المحلي حاليا ماتنشوفش راسي مع ناس كاينين فيه دبا “، واضافت ” مكاينش نقط الالتقاء والتعايش مع هد الاشخاص مستحيل، وانا موقفي من الاشخاص ماشي من الحزب”.
واردفت وحساة قائلة :” حاليا انا مزالا في البام وكاينين احزاب تاتصل بيا ، والاشخاص لي تايسيرو الحزب ببني ملال مايمكنش التعايش معهم ، هما تايفكرو فواد وانا فواد ، وماندعمش شخص انا ماتانؤامنش به وماتانؤامنش بالقدرات ديالو “.
دبا البرلمانية مريم خلات الناس فبني ملال تاتساؤل حول مصير حزب تراكتور خصوصا وان الهضرة تاتقصد بها الوافدين الجدد كيف قالت ، واش فعلا هد التراكتور بخير وعلى خير ، ام ان التصدعات والانقسامات غادي تخلي الساكنة تفقد الثقة فالحزب لي كان تصدر الانتخابات الماضية وجا هو الاول فالجهة بزعامة المحرك ديالو انذاك مجاهد !
