الله يعطيهم الصحة … طاقم مندوبية الصحة بأزيلال داير مجهود كبير وتايتواصل مع الساكنة وتاينشر ليهم جميع المستجدات فصفحة المندوبية بالفيسبوك والوزارة خاصها تعطي تعليماتها بالمزيد من التواصل ماشي إغلاق ابواب المعلومة على الرأي العام المحلي والجهوي والاكتفاء بالندوة اليومية لي كلشي تايشوفها فالتلفزة

13 أغسطس 2020
الله يعطيهم الصحة … طاقم مندوبية الصحة بأزيلال داير مجهود كبير وتايتواصل مع الساكنة وتاينشر ليهم جميع المستجدات فصفحة المندوبية بالفيسبوك والوزارة خاصها تعطي تعليماتها بالمزيد من التواصل ماشي إغلاق ابواب المعلومة على الرأي العام المحلي والجهوي والاكتفاء بالندوة اليومية لي كلشي تايشوفها فالتلفزة

تاكسي نيوز / حميد الخلوقي

 

مندوبية الصحة بأزيلال المثال الواضح على التواصل الدائم والشفاف مع الساكنة ، هد المندوبية نقدرو نقولو بلي تتربع على عرش باقي المندوبيات من حيث التواصل عبر صفحتها الفيسبوكية الرسمية ، وذلك من خلال اخبارها للمواطنين بتطورات الوضعية الوبائية بالاقليم وهكا تاتقطع الطريق على الاشاعات لي تاتروج بين الساكنة في بعض الاحيان.وطبعا هد التواصل ماشي غريب على ازيلال لي فيها عامل اسمو العطفاوي لي معروف عليه التواصل مع الناس  وماعندو مايخبي عليهم.

هاد المندوبية ديال ازيلال تاتنشر حالات الاصابة وقت ما تم الاكتشاف ديالها وتاتعطي شحال وتاتخبر الناس بالجماعات لي تسجلات فيها هد الحالات ، بل تاتنشر حتى النتائج ديال التحاليل والكشوفات المخبرية ، ماشي بحال شي مندوبيات سادين الباب عليهم وناعسين تايشخرو فالمكاتب المكيفة ديالهم وسادين هواتفهم على الاعلام بحال الى الصحفي بغا يطلب منهم شي صندوق ديال التفاح او البرقوق في حين انه باغي فقط معلومة تايضمنها الدستور والقانون ومن حق المواطن يعرفها ، وشي مندوبيات لاهما نشرو للساكنة المستجدات ولا هما تواصلو مع الصحافة الجهوية والمحلية يعني بهاد المفهوم ديال المثل الشائع “مارحمو ماخلاو رحمة سيدي ربي تنزل”.

وباش مانكروش المجهودات ديال المديرية الجهوية والمندوبيات ديال الصحة فلابد نشيدو بالتواصل والانفتاح ديال المديرية الجهوية للصحة وايضا بمندوبية خنيفرة لي كانت نعم التواصل وكانت بحال ازيلال وكان مندوبها تايخرج بتصريحات وندوات، لكن هد الايام مابقاش داك التواصل ، وهدشي ربما راجع لقرارات وزارة الصحة لي فبلاغها امام الكاميرات قالت خاص المديريات والمندوبيات يتواصلو مع الصحافة والساكنة ولكن من تحت الدف ربما تايقولو ليهم زايرو السمطة وسدو باب التواصل شوية ، ونتمناو ان حتا المندوبية ديال ازيلال مايجيوهاش شي تعليمات وتولي صفحة ديالها بحال باقي الصفحات الاخرى لي تاينشرو غا الحصيلة ديال الوزارة ولي اصلا المغاربة تايشوفها فالتلفزة ومامحتاجينش المندوبيات تنشرها، الساكنة المحلية محتاجة تفاصيل الاصابات (اشمن جماعة وشحال بالضبط ونتائج المخالطين والتحركات ديال الاطر الصحية ولاسيما فاش تايشوفو سيارات الاسعاف كثيرة تاتجول فالشوارع ووو) اما الحصيلة اليومية فراه يكفي تشعل تلفزة وتعرف كلشي.

دبا الكرة عند العمال ديال الاقاليم لي هما لي عندهم الصلاحية الكاملة باش يرجعو بعض الصفحات كيف كانت  ويحثو المنادب على التواصل عبر الصفحات الرسمية ديالهم وخصوصا ديال خنيفرة لي الساكنة مابقاتش عارفة اش واقع من نهار وقفات الصفحة ديال مندوبية الصحة عن تقديم التفاصيل ديال حالات كورونا وهكا فتحات لباب للاشاعات.

الصور من صفحة مندوبية ازيلال لعمل الاطقم الصحية:

 

الاخبار العاجلة