المواطن راه عاق وفاق… حزب الميزان جا دار حملة انتخابية ببني ملال وأزيلال وخنيفرة وزروني كل 5 سنوات مرة!!

18 مارس 2019
المواطن راه عاق وفاق… حزب الميزان جا دار حملة انتخابية ببني ملال وأزيلال وخنيفرة وزروني كل 5 سنوات مرة!!

عمر شهبون

 

سمعنا وقرينا فمواقع كثيرة وبينها موقع تاكسي نيوز على شي لقاءات تواصلية ببني ملال وازيلال للبرلمانيين ديال حزب الاستقلال فالبرلمان ومجلس المستشارين ، وهاد لقاءات استخدم فيها حزب الميزان جميع الادوات الحربية المتاحة للهجوم على حكومة العدالة والتنمية ، وسمعنا شعارات رنانة لنزار بركة ومضيان والمكاوي وحيون ووو..

دبا هاد ناس واش تايسحاب ليهم الشعب مازال مكلخ ولا شنو، كيفاش بغاونا نصدقو بلي هما جايين يتواصلو مع الساكنة وفي نفس الوقت هما تايمررو المساجات ديالهم الانتخابية وتايوجدو للاقتراع المقبل ، وتايهضرو على منجزاتهم في بني ملال وفي ازيلال وخنيفرة، طبعا كيف تايقولو لهضرة ما تجيب خضرة ، والشفوي كان هو السائد في هذ اللقاءات ، اشنو دار حزب الاستقلال لساكنة الجبل ،اشنو هي انجازات حكومات الاستقلاليين لجبال بني ملال وازيلال وخنيفرة ، واش نساو راسهم فاش كانو فالحكومة كانو تاياخدو تاهما قرارات لاشعبية وكانت الاحتجاجات كثيرة عليهم ، واش ما فراسهومش داك الشعار الشهير لي تايرددوه المحتجين فجميع الوقفات الاحتجاجية لي تايقول :” عليك امان عليك امان لا عباس لا بن كيران” في اشارة لحكومة عباس الفاسي الاستقلالية.

بلاما نضحكو على روسنا ، لو ان هاد الناس بغاو يسمعو للسكان كانو غادي يخرجو لتيران ويطلعو لجبال مودج وتفرضين واغرغر ، وتيزي نيسلي واغبالة الشامخة، وبوتفردة ، كانو يطلعو لتاكلفت وتيلكيت وواويزغت وايت بوكماز وتامجوط ومريرت ولقباب وايت سحاق.ووو ، حيك ناس تماك مقسحين بزاف وخاصهم بزاف المتطلبات كالطرقات والماء والضو وسبيطارات والادوية ووو، ماشي يمشيو فالطرق المعبدة بسياراتهم الفارهة ويدخلو للخيمة ويقولو لينا :” هاحنا جينا لا تقولو ماجينا”.

لي خاص يعرف حزب الاستقلال وغيرو من الاحزاب “الاستغلالية” المغربية بلي الشعب عاق وفاق ، وزمن تكلاخ راه مشا ، ودوك ناس لي فاعالي الجبال رغم البساطة ديالهم راه فاهمين اللعبة ديالكم ، وعارفينكم تاتواصلو معهم غا على حاجتكم الانتخابية ، وعارفينكم تاتغنيو ديك الاغنية ديال :” زوروني كل 5 سنوات مرة ، تنسوني بالمرة حرام”…

الاخبار العاجلة