مكاين لا حق المعلومة لا هم يحزنون… علاش المجالس الادارية ديال لاراديت والاكاديمية كانت مغلقة في وجه الصحافة واش ماشي من حق الشعب يعرف اشنو ضاير فالمؤسسات ديالو !!

تاكسي نيوز 

في الوقت لي المغرب عرف واحد التطور كبير ودار قانون خاص بالحق فالوصول الى المعلومة سواء للمواطنين او للاعلام والصحافة ، تانشوفو شي مؤسسات بجهة بني ملال خنيفرة تغرد خارج السرب ، وتقوم بالتعتيم على المعلومة وتقصي من مجالسها الادارية الصحافة ، دون ان توضح اسباب ذلك.

فمثلا وكالة لاراديت وايضا أكاديمية التربية والتكوين بجهة بني ملال خنيفرة هذ الاسبوع عقدو مجالس ادارية وحضروها مسؤولين كبار ، لكن للاسف الصحافة تم التغييب ديالها ، وهدشي تايخلينا نستغربو لهد القرار ، مادام ان المغرب قطع اشواط طويلة ومتقدمة في مجال الحصول على المعلومة وتنوير الرأي العام ، اللهم الى كانت هد الادارات عندهم شي حاجة بغاو يخبيوها على عباد الله وتايخافو الصحافة الى حضرات تفضحهوم وتنقلها بكل امانة للشعب .

طبعا مكاينش مبررات تقدر تقنعنا بان غياب الصحافة امر طبيعي والمجلس الاداري تايكون سري ، حيك مثلا اكاديمية الدار البيضاء سطات ستدعات الصحافة ديال الجهة هد الاسبوع وقام مومن الطالب لي معروف عليه الشفافية والوضوح فاش كان فبني ملال بتقديم شروحات للصحافة واجاب على جميع استفساراتهم حول المجلس الاداري لاكاديمية الدار البيضاء سطات ، ماشي بحال عدنا فجهة بني ملال الاكاديمية رسلات للزملاء بلاغ قالت فيه لي بغات ونقات فيه كلشي ، بحال الى الصحافيين جناح دعوي ديالهم وتايخدمو وفق اهواء الادارات ، وبحال الى هما ماشي شركاء ديال الاكاديمية وديال لاراديت للنهوض بهد القطاع المعطوب.

دبا حنا وايضا معنا المواطن عدنا قناعة راسخة بلي اي مجلس اداري لي تاتكون فيه الحصيلة ديال العمل ديال السنة سواء لاراديت سواء الاكاديمية، الى كان مغلق راه هدشي تايخلي عدنا شكوك ياكما شي حاجة كاينة مابغاوناش نعرفوها ، ثم لي خاص المسؤولين يعرفو بانهم خدامين عند الشعب ودوك الادارات كاملين من حق داك الشعب يعرف فين غادي التسيير الاداري والمالي ديالها ، اما الى كانو شركات في ملكية اصحابها فهذي هضرة اخرى وماعدناش الحق نقولو حتا كلمة!!!