حزب الوردة بالفقيه بن صالح يسلط كتائبه الالكترونية الشوكية لتكميم أفواه الصحافيين وثنيهم عن انتقاد المنتخبين

17 يونيو 2018
حزب الوردة بالفقيه بن صالح يسلط كتائبه الالكترونية الشوكية لتكميم أفواه الصحافيين وثنيهم عن انتقاد المنتخبين

تاكسي نيوز / الفقيه بن صالح 

 

حزب الوردة بالفقيه بن صالح هد الحزب العتيد لي خرجو منو مناضلين كبار ، ماكانوش يضنو بان الوردة غادي يجي زمان وبدل ما تلتازم بخطاب الاقناع والتواصل ، غادي تحشد الاشواك ديالها وتجيشهم وتسلطهم على كل صحفي نتاقد الحزب او نتاقد اداء عضو او قيادي بالحزب.بحال كيف ماوقع مع تاكسي نيوز والزميلة الفقيه بن صالح نيوز وغيرهم.

فالكتائب الالكترونية المريضة كان معروف بها حزب المصباح وكان تايحارب بها كل واحد نتاقدهم ولكن مع مرور الوقت تبتات انها فشلات حيك القارئ راه ماشي هبيل او حمق يصدقها ويصدق دكشي لي تاتكتب ، حقاش الصحفي فاش تاينتاقد وزير او نائب برلماني او منتخب كيفما كان نوعو ، راه من المستحيلات ينزلو تعليقات ديال قراء عاديين تايمجدو وتايضربو الطارة وتايهاجمو كاتب المقال ، حيك المواطن عارف السياسيين والتجربة اكدات انه القليل من المعلقين لي يقدرو يشيدو بشي مسؤول مزيان. هدشي طبعا بلا ما نهضرو على واحد الصنف ماهو كتائب حزبية شوكية ما هو منتمي للحزب ،هو صنف معروف بلحيس الكابا وضريب البندير للاسياد ديالو باش فالعشية يمشي ويشد شي زرقلاف .

رجعو لحزب الوردة بالفقيه بن صالح لي ولى مسلط الكتائب ديالو الشوكية على الصحافيين هد الايام ، والغريب ان الزعيم لي نتسناو براكتو تاتلقاه هو لي متزعم هاد الكتيبة مستاند على لغة التخوين والتشكيك وترهيب الاقلام ، بحال الى هو زعما ملاك طائر لا يأتيه الباطل والصحافيين كلهم مشريين وبايعين الماتش ووو.

هدشي فالوقت لي خاص الحزب يشوف كيفاش فشلات تجربة المصباح والبام فمسألة الكتائب ، ويعتامد اسلوب تانعارفو به المناضلين الاتحاديين الاشاوش لي تايتواصلو عبر البلاغات التوضيحية والتواصل مع الصحافيين وتنويرهم بالارقام والمعطيات وليس بالاشواك كما يفعل بعض الاتحاديين فالفقيه بن صالح وكتائبهم اللي تسيء لهم اكثر مما تدافع عنهن وتلمع صورتهم.

وفي الاخير حزب الوردة بالفقيه بن صالح ليس مقدسا وليس قرآنا ومنتخبو الوردة بشر ماشي آلهة نقدسوهم وما دخلو للتسيير الا وهما عاارفين بانهم غادي يتعرضو للانتقاد من طرف الصحافة ومن طرف الشعب لي صوت عليهم.

فرجاء يا زعيم الوردة حافظ على حزب بن بركة واليوسفي والمناضلين الاحرار لي فداو الوطن بدمائهم الطاهرة الشريفة ولي بسبابهم نحترم حزب الوردة وتانقدرو جميع مناضليه.

الاخبار العاجلة