اش هاد التخربيق واخليو السلطات والقضاء يديرو خدمتهم… شي ناس دارو جلسة وناقشو ملف الطاجين المدود وحكمو على العائلة مولات الفيديو بانهم مدفوعين من طرف منتجع مدينة اخرى وبلي هما لي جابو الدود وداروه فالطاجين!!!

13 مايو 2022
اش هاد التخربيق واخليو السلطات والقضاء يديرو خدمتهم… شي ناس دارو جلسة وناقشو ملف الطاجين المدود وحكمو على العائلة مولات الفيديو بانهم مدفوعين من طرف منتجع مدينة اخرى وبلي هما لي جابو الدود وداروه فالطاجين!!!

محمد الأشهب

 

غريب والله الى غريب ، شي وحدين خرجو تايروجو شي هضرة غير مفهومة ، في واقعة الطاجين لي لقاو فيه الدود في شلالات اوزود . أسيدي اش هدا ما هدا ناضو هاد الناس الفهايمية دارو محاكمة صورية بلا خبار القانون ودارو فيها محاكمة للعائلة لي لقات الدود ، وحكمو عليهم بلي راه هما لي جابو الدود وداروه ، وبلي هما مدفوعين من طرف اعداء السياحة!!. والخطير هو شي وحدين فيهم ناضو تايقولو بلي هدشي يقدر تكون موراه مدينة مجاورة عندها منتجع بغات تخسر السياحة في اوزود باش الناس يجيو عندها !!! مي مي ، اولا غادي نبداو بهاد القضية الاخيرة والخطيرة ولي فيها نوع من الدعوة الى تصادم عمال الاقاليم ، وبين سكان هاد المدن . هاد الناس لي قالو هدشي يا مكلخين ، يا باغيين ينوضو الفتنة بين الناس . وثانيا ، سيرو دخلو سوق روسكم ، وخليو السلطات دير خدمتها سواء السلطات المحلية او الامنية او القضائية ، وخصوصا القضاء راه هو لي مخول يصدر الاحكام من بعد نهاية التحقيق ، والى شاف بلي مول الفيديو مذنب غادي يعاقبو . ماشي يجي واحد عقليتو فيها جليجة ويبدا يكتب في صكوك الاتهام ، ويبغي يلصق للعائلة تهمة جاهزة لي تقدر دخلهم للحبس . البلاد فيها قضاء وهو لي من حقوا يعطي الاحكام وراه هاد الناس غالطين تايسحابليهم غادي يضغطو على القضاء بهاد الطريقة الساذجة لي تاتزيد تعقد الامور لمالين المحلات كثر ما تاتحل المشاكل.

 

سي العطفاوي معروف عليه راجل مزيان وديال الحق ، وهد الواقعة طبعا تكون صحيحة او لا ، غادي تخليه يراجع المراقبة في جميع المواقع السياحية في ازيلال ماشي غا اوزود بوحدها  ، حيت باش نكونو واضحين ، راه الكثير من المطاعم والمحلات بالمغرب تايضبطو عندهم الماكلة موسخة ، وبدليل فرمضان شوفو شحال ديال الاطنان ديال السلع حجزات السلطات في جماعات ازيلال ، تاهي راه مؤامرة وباغيين الخدمة فالتجارة والاقتصاد ديال ازيلال ؟ طبعا هذا المنطق ديال هدوك الفهايمية لي طلقو الاحكام قبل انتهاء التحقيق .

 

هاد الناس قالو علاش 30 طاجين كلها نقية الا هد الطاجين ؟ علاش صوروه ؟ علاش بغاو يشوهو مول القهوة؟ كيفاش الدود بقا حي وخا الطاجين طايب فعافية عالية ؟

 

وناس اخرين جاوبوهم علاش غايكدبو عليه افراد هاد العائلة؟ وكيفاش يمكن ليهم يجمعو هاد العدد الكبير من الدود ،وعلاش ماشادوهمش الكاميرا ؟ وعلاش الخدام تايقول ليهم اراو الطاجين ؟ واشنو العلاقة عندهم مع مول المطعم ؟ وعلاش هو بالضبط لي استهدفوه ؟ واش هاد الدعوات بالتحقيق مع العائلة ، واش ماشي ترهيب للناس باش لي لقا شي حاجة فشي ماكلة في اي موقع سياحي سواء بازيلال او بني ملال او خنيفرة او او او .. خاصو يضرب الطم والا راه متواطأ وبغا يدمر السياحة ويركبو لو نظرية المؤامرة ويتسببو في اعتقالو …

 

حنا نمشيو بعيد كاع فالنقاش ، اشنو غايوقع الى كاع لقينا طاجين فاسد من بين 40 طجين ومن بين بزاف المطاعم ، راه اصلا مطاعم عالمية لقاو فيهم الفيران والبخوش ووو، ورغم ذلك راهم خدامين ، حيت الخطأ يقدر يوقع واللي تايصاوب الماكلة راه بشر ماشي مكينة او روبو . راه مؤخرا مطعم فبني ملال تسممو فيها بزاف ديال الناس ، علاش ماينوضوش الفهايمية و يقولو راه شي وحدين بغاو فيه الخدمة ودارو دكشي فالماكلة ، وبغاو يضربو السياحة فبني ملال. طبعا ماقالوش هدشي لانه هراء وتخربيق صادر من عند ناس ساذجة .

وفين كاين المشكل الى السلطات سدات واحد لمحل سيمانة او جوج ، باش ينقي المحل ويعاودو فالنظافة والتجهيزات ، ويرجع يحل ويخدم مع راسو… فين كاين المشكل ؟  وعلى هاد القبال وعلى حسب الاحكام الجاهزوة كان على  السلطات ماتسدش المطعم حقاش غادي تكون ضلماتو ، اللهم الى كانو تايسدو دون تحقيق؟!!!

 

واش فنظركم واقعة معزولة رغم انها انتشرت فجميع المدن المغربية ، واش غادي تقدر تحبس الناس باش مايجيوش لازيلال ، ابدا ماعمر السياحة طيح بسبب حادث معزول. المغاربة راهم واعيين وفاهمين ، مايجيوش وحدين فلاسفة زمانهم ويبداو يألفو فالقصص الفارغة.

 

غانقولو خليو التحقيق يمشي ، وخليو القضاء يدير خدمتو ، وخليو العمالة دير مراقبتها ، هدشي كلو فصالح اوزود وفصالح المواطن لي تاتبقى الصحة ديالو فوق اي اعتبار ، ومن حقو ياكل وهو مطمئن وهاد الاطمئنان راه السلطات لي تاتسهر عليه وتاضمنو ليه.

 

وأخيرا.  راه السياحة باوزود بألف خير خاص غا يفوتوها شي فهايمية من الانتهازيين الربحيين لي تاياكلو ما في البر والبحر والجو….

الاخبار العاجلة